Komitə nümayəndələri Ukrayna Azərbaycanlıları ilə görüşüblər

18 Noyabr, 2019

Kiyevə səfər çərçivəsində Diasporla İş üzrə Dövlət Komitəsinin nümayəndə heyəti Ukrayna Azərbaycanlıları Radasının (UAR) toplantısında iştirak edib.

Tədbirdə çıxış edən Dövlət Komitəsinin aparat rəhbər Daşqın Rəcəbli toplantı iştirakçılarına sədr Fuad Muradovun salamlarını çatdırıb. Aparat rəhbəri Ukrayna azərbaycanlılarının birlik, təşkilatlanma və mütəşəkkil fəaliyyət göstərmək yolunda atdığı addımları yüksək qiymətləndirərək, Dövlət Komitəsinin həyata keçirdiyi yeni və mühüm layihələrdən danışıb.

Qeyd edib ki, Dövlət Komitəsi sədrinin və nümayəndə heyətlərinin xaricə səfərləri intensivləşib, əhatə dairəsi genişlənib və bu məqam diaspor hərəkatının genişlənməsinə çox ciddi və müsbət təsir göstərib.

Toplantıda Diaspor TV, Diaspor FM, Diaspor xəritəsi və Diaspor Gənclərinin Yay Düşərgələri, Azərbaycan Diasporuna Dəstək Fondu barədə ətraflı məlumat verilib. Diaspor FM-in getdikcə daha çox dildə yayımlanması üçün addımlar atıldığı, xaricdə yaşayan onlarla gəncin Yay Düşərgələri vasitəsilə ilk dəfə Azərbaycana gəldiyi, tarixi Vətənləri ilə tanış olduğu, bu düşərgələrin onların şəbəkələşməsində böyük rol oynadığı vurğulanıb. Tədbirdə Dəstək Fonduna layihələrlə müraciət etmək qaydaları bir daha izah olunub.

Xaricdəki həftəsonu məktəblərinin, xüsusilə də "Qarabağ" Azərbaycan məktəblərinin yaradılmasına və fəaliyyətinə diqqət cəlb edilib, Dövlət Komitəsinin təşəbbüsü ilə hazırlanan "Azərbaycan dili" dərsliyinin yaxın müddətdə xaricdəki soydaşlarımıza çatdırılacağı bildirilib.

Diaspor təşkilatları ilə bu cür görüşlərin keçirilməsində məqsədin soydaşlarımızı dinləmək, onlarla fikir mübadiləsi aparmaq və mövcud problemlərin həllinə kömək etmək olduğu bir daha nəzərə çatdırılıb.

UAR-da təmsil olunan diaspor təşkilatlarının rəhbərləri və üzvləri çıxış edərək, sözügedən qurumun fəaliyyətindən, Ukraynadakı əhatə dairəsindən, görülən işlərdən danışıblar. Onlar bu ölkədə soydaşlarımızın sayının çox olduğunu vurğulayaraq, UAR-ın sıralarının genişlənməsi, daha böyük gücə çevrilməsi üçün məqbul olan yolları, həftəsonu Azərbaycan məktəblərinin sayının artırılmasının vacibliyi barədə fikirlərini söyləyiblər.

Soydaşlarımız Dövlət Komitəsinin xarici ölkələrdə mütəmadi olaraq görüşlər keçirməsini, Azərbaycan Diasporuna Dəstək Fondunun yaradılmasını, eləcə də diaspor.gov.az saytının aktivliyini, Diaspor TV-nin fəaliyyətini yüksək qiymətləndiriblər.

Tədbirdə soydaşlarımızın sualları cavablandırılıb, onların səsləndirdikləri təkliflər barədə rəhbərliyə məlumat veriləcəyi bildirilib.